Steg i ein planprosess

Alle som ønskjer å utarbeida ein reguleringsplan bør først ta kontakt med kommunen. Eit førstekontakt-møte er eit møte for gjensidig utveksling av informasjon mellom forslagsstillar og plan og bygg, og det blir stilt ingen formelle krav til levering av materiale. 

Private forslagsstillarar som ønskjer å starte ein planprosess skal sende eit planinitiativ til kommunen seinast samtidig med førespurnad om oppstartsmøte etter plan- og bygningslova § 12-8 første ledd andre punktum. Det er ønskjeleg at forslagsstillar søkjer dialog med kommunen tidleg i arbeidet med planinitiativet for å avklara forventningar og omfang, og at dette m.a. blir tilpassa kompleksiteten i prosjektet og lokale forhold. Planinitiativet skal i nødvendig grad omtala premissane for det vidare planarbeidet, og gjera greie for

•    Formålet med planen

•    Planområdet og om planarbeidet vil få verknader utanfor planområdet

•    Planlagt busetnad, anlegg og andre tiltak

•    Utbyggingsvolum og byggjehøgder

•    Funksjonell og miljømessig kvalitet

•    Tiltakets verknad på, og tilpassing til, landskap og omgivnader,

•    Forholdet til kommuneplan, eventuelle gjeldande reguleringsplanar og retningslinjer, og pågåande planarbeid

•    Vesentlige interesser som blir ramma av planinitiativet

•    Korleis samfunnstryggleik skal varetakast, mellom anna gjennom å førebyggja risiko og sårbarheit

•    Kva for nokre ramma offentlege organ og andre interesserte som skal varslast om planoppstart

•    Prosesser for samarbeid og medverknad frå ramma fagstyresmakter, grunneigarar, festarar, naboar og andre ramma

•    vurderinga av om planen er omfatta av forskrift om konsekvensutgreiingar, og korleis krava i tilfelle kan bli vareteke.

I tillegg ønskjer Valle kommune at planinitiativ skal innehalda følgjande

•    Kart med forslagsstillars forslag til planavgrensing.

•    Skisser/ illustrasjonar av ønsket tiltak dersom det ligg føre.

•    Kva infrastrukturtiltak (teknisk og grøn infrastruktur) er tenkt regulert og opparbeidd?

•    Ei skildring av moglege konsekvensar for klima og miljø, t.d. klimagassutslepp, under dette arealbruk, transport, natur (nedbygging av ulike markslag), gjenbruk (sirkulærøkonomi), destruksjon, materialval, naturmangfald, vassforskrifta § 12 osb.

•    Beskrivelse av spesielle løysingar for å redusera energiforbruk/ leggja til rette for fornybar energiproduksjon.

•    Er det spesielle utgreiingar som bør gjennomførast som ein del av planarbeidet?

•    Er det andre grunneigarar eller rettshavarar enn forslagsstillar innanfor foreslått planavgrensing?

•    Forslag til overordna framdrift.

•    Eventuelt andre materiale/ andre opplysningar som fôreslagsstiller meiner er relevant. 

Forslagsstillere kan gjennomføra varsling og oppstart av planarbeid etter gjennomført oppstartsmøte. Forslagsstillar skal bruka adresseliste motteke frå plan og bygg. I varslingsperioden arrangerer forslagsstillar medverknadsmøte. 

Etter varslingsperioden skal forslagsstillar senda kopi av utsegner, oppsummering av desse og dessutan kommentarar til plan og bygg. Plan og bygg ønskjer møte undervegs for å diskutere løysingar i planen. Skisseforslag, presentert i ein enkel 3D-modell blir sendt til plan og bygg i forkant. 

Følgjande må sendast inn slik at planforslaget kan takast opp til behandling:

•    Plankart (sosi-fil og PDFfil)

•    Reguleringsføresegner (dokument-fil og PDFfil)

•    Planskildring med illustrasjonar i samsvar med vedleggsliste (dokument-fil og PDFfil)

•    Overordnet VA-plan

•    Lengdeprofil og tverrprofiler på veg

•    Illustrasjonsplan

•    Enkel 3D-modell

•    Roš-analyse 

Forslagsstiller sender inn justert plankart og planskildring (og eventuelt andre illustrasjonar/dokument) som følgje av politisk vedtak før offentleg ettersyn. Det er ønskjeleg at forslagsstillar deltek på medverknadsmøte i samband med høyringsperioden. 

Etter offentleg ettersyn kommenterer forslagsstillar dei mottekne høyringsinnspela, og skal foreslå eventuelle endringar i planen. Kommunen og forslagsstillar drøftar eventuelle justeringar som følgje av høyringsinnspel. Forslagsstillar sender inn justert plankart og planskildring (og eventuelt andre illustrasjonar/dokument) før planforslaget blir fremja til politisk sluttbehandling. 

Dersom Plan- og miljøutvalet vedtek endringar i plandokumenta, må forslagsstillar senda inn justert plankart og planskildring (og eventuelt andre illustrasjonar/dokument) før kommunen kan senda ut melding om vedteken plan. Revidert enkel 3D-modell og komplett 3D-modell blir send inn for lagring i basen til kommunen.