5. klasse ved Valle skule på besøk til KUBEN
I fleire veker i haust har 5. klasse ved Valle skule hatt temaet slavehandel på pensum - som del av det heile vitja dei KUBEN i Arendal og såg utstillinga “Slavegjort”.
Publisert av Ole Birger Lien
Publisert 18.12.2025 08:48
Sist endra 18.12.2025 08:48
Frå turen til KUBEN. Frå venstre: Olav Austad Uppstad, Silje Rike, Silverine Hlawnceu, Sigurd Haugeland Omnes, Alvilde Botn, Othelia Falkelid og Vilja Elena Slaby Driel.
Margrete Lien
På KUBEN fekk elevane sjå gjenstandar og deler frå slaveskipet Fredensborg, som gjekk ned utanfor Arendal i 1768. Mange av historiane, og ikkje minst gjenstandane frå både Amerika og Afrika, gjorde sterkt inntrykk.
Mannen med maska
Elevane hadde gjort research og oppdaga at originalbiletet av Daniel Oddeskar låg i arkivet i KUBEN. Oddeskar (Daniel Folkesson Løyland) (fødd 1804, død 1877) var husmann på husmannsplassen Oddeskar i Ljosådalen i grensetraktene mellom Valle og Bykle rundt 1860. Han var gift med Ingebjørg Oddeskar og dei hadde sju born saman. Ein vårdag i 1862 var det ein bjørn på plassen. Då Daniel prøvde å jage han bort, angreip bjørnen Daniel og skamferte han ille i ansiktet. Resten av livet gjekk han med ei ansiktsmaske. Også denne historien gjorde naturleg nok inntrykk på femteklassingane.