Alt klart for folkefest i Valle 17. mai!

Ole Birger Lien

Frå klokka 07.00 og skramletog frå Eiksenteret på Rysstad går det slag i slag dagen gjennom. Frå Rysstad blir det biloppstilling klokka 10.15, biltoget startar kvarteret seinare. I Valle er det gudsteneste, tale og kransenedleggjing ved Valle kyrkje, før folketoget går sørover til kultursenteret.

NRK sender

Vel framme ved Valle kultursenter tar matsalet til klokka 12.30. Valle leikarring kastar seg ut i det 12.55, og NRK filmar med drone frå klokka 12.59 og i fire minuttar! Leikar og aktivitetar elles tar til klokka 13.00, og festprogrammet i Storstoga går frå klokka 15.00. Ukrainske Maryna Kylivinyk har tale for dagen, Valle kulturskule og Grannelaget har kulturinnslag, og det skal mellom anna utdelast utviklingsstipend innan idrett og kultur ved ordførar Lars Tarald Myrum. Programmet held på til kring klokka 16.00.  Valle radio har videooverføring under gudstenesta frå i Valle kyrkje klokka 11.30 og frå festprogrammet frå kultursenteret klokka 15. Også på Valle bygdeheim blir det eige program 17. mai - så dette teknar til å bli ein folkefest der alle skal med!