Flott 17. mai-feiring i Valle!

Mange fekk 17. mai-feiringa med seg. Martin Nilsen

Med tettpakka program, frå skramletog på Rysstad grytidleg om morgonen, biltog til Valle og full pakke gjekk det slag i slag dagen gjennom med feiring der store og små fann saman og koste seg i tidvis veldig fint ver. Med tog og folk oppover også til Valle bygdeheim fekk heile bygda og kommunen ta del i den fine dagen. At NRK filma med drone, og leikarringen på det viset fekk sjarmere heile Noreg - var ein fin prikk over i-en!

Mange med

Oppslutninga 17. mai var som alltid god. Bygdefolk og innflyttarar, tilreisande og nye landsmenn - alle samla dei seg for å feire verdiar og eit samfunn mange nasjonar rundt om i verda kan misunne oss. Så vart det då også frå fleire i talane peika på nettopp det, at i dag skal ein ikkje ta fridom og sjølvstende som ein sjølvsagt ting, men noko ein må kjempe for å bevare. Med ei verd full av uro er det ikkje vanskeleg å seie seg samd i det. Ekstra godt då, at nasjonen, byane, bygd og grend kan samle seg om ein slik flott dag!

Det var litt av eit tog som gjekk frå sentrum og sør til Valle kultursenter nasjonaldagen. Kjell Ole Homme

Heile landet fekk glimt frå Valle på NRK 17. mai. Skjermbilete

Anne Homme Harstad (nærast) og Lene Dale Kjelleberg gjorde ein solid innsats for lyd i toget sør mot kultursenteret! Birgit Homme Harstad

Maryna Kylivinyk heldt tale for dagen i Valle. Birgit Homme Harstad

Flaggberar var Valle-ordførar Lars Tarald Myrum. Martin Nilsen