ORDENSREGLEMENT FOR VALLE SKULE 

§ 1 LOVHEIMEL 

Ordensreglementet regulerer elevane sine rettar og pliktar på skulen/ skuletid så lenge dette ikkje er fastsett i anna lovverk jf. opplæringslova §2-9 og §3-7.  

§ 2 FORMÅL 

Formål med orden og åtferdsreglar er å oppretthalde eit trygt og godt læringsmiljø for alle. Elevar, foreldre og tilsette ved skulen har i fellesskap ansvar for å skape eit skulemiljø som fremjar helse, trivsel og tryggleik for alle. 

§ 3 GENERELT 

Grunnskulen i Valle skal vere prega av eit konstruktivt samarbeid mellom elevar, foreldre/ føresette og tilsette med fokus på skulen sine verdiar. Ordensreglementet skal verne om og skape eit inkluderande skule- og læringsmiljø.  

Grunnskulen i Valle skal ha nulltoleranse mot krenking som mobbing, vald, diskriminering og trakassering og ordensreglane skal regulere at god åtferd blir utført og at alle elevar skal vere inkludert i eit fellesskap.  

Grunnskulen i Valle skal vere skjermbevisst. 

§ 4 INNHALD OG VIRKEOMRÅDER 

Ordensreglementet inneheld reglar om orden og åtferd, reglar om kva for tiltak ein skal kunne nytte når elevar bryt ordensreglementet og om handsaming av regelbrot. 

Ordensreglane gjeld for alle elevar ved Valle skule i skuletida, på skulen sine områder, på skuleturar, ekskursjonar i skulen sin regi og på skuleveg. Ordensreglane omfattar også det som skjer i digitale rom i skuletida. Skulen pliktar å gjere elevar, føresette og tilsette kjente med orden- og åtferdsreglementet. 

§ 5 ELEVANE SINE RETTAR 

Som elev har du rett til: 

• eit inkluderande, trygt og godt skulemiljø 
• å blir møtt med omsorg og respekt 
• ein kvardag utan krenking og trakassering 
• å ha dine eigedelar i fred 

§ 6 ELEVANE SINE PLIKTAR 

ORDEN 

På Valle skule har vi god orden.  

God orden er: 

• å møte fram presist til timen og vere førebudd til skulearbeidet 
• å halde orden i skulesaker/ -utstyr, klasserom og på skuleområdet, samt levere heimearbeid til avtala tid 
• å rette seg etter reglar på skulen inkl. reglar for friminutt og bruk av digital teknologi 

ÅTFERD 

På Valle skule har vi god åtferd.  

God åtferd er: 

• å respektere og syne omsorg for kvarandre 
• å passe på at alle har det greitt, ikkje mobbe eller på annan måte krenke andre 
• å tale godt om og til kvarandre ved å unngå skjellsord, banning og anna ufin tale 
• å vere på skulen og delta aktivt i opplæringa gjennom heile skuledagen 
• å bidra til god arbeidsro/ arbeidsflyt 
• å rette seg etter beskjedar frå tilsette ved skulen 
• å rette seg etter reglar på skulen inkl. friminutt og bruk av digitale teknologi 
• å ikkje snuse, røyke eller vere påverka av andre rusmiddel 
• å ikkje bringe våpen, våpenliknande gjenstandar eller andre farlege gjenstandar til skulen/ skulen sitt område 
• å ikkje jukse, men levere eige arbeid 

§ 7 FRÅVERE 

Elevane har rett og plikt til grunnskuleopplæring og skal til vanleg vere på skulen kvar dag.  

Fråvær ved sjukdom skal meldast til skulen same dag sjukdom oppstår.  

Fråvær av andre årsaker skal søkjast om i godt tid før det er behov for permisjon. 

PRESISERING AV REGELVERKET 

Gjenteke ugyldig fråvær er brot på ordens- og åtferdsreglementet, og dette skal leggjast vekt på ved fastsetting av orden- og åtferdskarakter(gjeld 8-10 trinn).Vurderingsgrunnlaget skal vere orden- og åtferd siste halvår. Foreldre/ føresette skal kontaktast ved ugyldig fråvær og forseintkoming for å få klarlagt årsak til fråværet. 

Når det er forsvarleg, kan skulen etter søknad gje eleven permisjon i inntil to veker/ ti dagar (Opplæringslova §2-11). 

§ 8 MOGELEGE KONSEKVENSAR VED REGELBROT 

Alle konsekvensar skal vere av ein slik art at eleven forstår kva for reglar som er brotne og kvifor skulen må reagere på dette. Eleven skal, dersom det er mogeleg, få høve til å gjere opp for seg. Tiltak mot elevar som bryt reglementet for skulen, skal ikkje innebere fysisk refsing eller anna krenkjande handlingar. Å straffe ei heil gruppe elevar for noko ein elev har gjort, er ikkje lov. 

Om ein elev bryt reglane, kan dette vere konsekvensar: 

• samtale elev/tilsett 
• dialog med heimen 
• merknad 
• skriftleg varsel til elev/ heim om nedsett ordens- og åtferdskarakter. 
• pålegg om oppgåver for å rette opp skade som er påført skulen/ medelevar sine eigedelar (kan skje før/ etter skuletid) 
• nedsett karakter i orden ved gjentatt regelbrot dersom føresett på førehand er varsla (jf. forskrift opplæringslova § 3-5 til 3-7). Ved særs grove enkelthendingar kan også karakter setjast ned (jf. forskrift opplæringslova §3-5). 
• bortvising frå undervisninga for enkelttimar eller bortvising for resten av dagen (opplæringslova §2-10) ved alvorlege hendingar (1.-10. trinn)  
• bortvising frå undervisninga inntil tre dagar (gjeld berre for 8.-10. trinn, jf. §2-10). I heilt spesielle tilfelle kan kommunen vedta eit midlertidig eller permanent skulebytte. 

Orden- og åtferdskarakter 

G = GOD: vanleg god orden og vanleg god åtferd. 

NG = NOKSÅ GOD: klare avvik frå vanleg god orden og vanleg god åtferd. 

LG = LITE GOD: i ekstraordinære tilfelle ved store avvik frå vanleg god orden og åtferd 

§ 9 IKRAFTSETJING 

Ordensreglane trer i kraft 01.08.2022. 

Revidert våren 2022. 

Involverte partar: 

Elevråd 

FAU 

Tilsette 

Leiargruppa skule 

Neste revisjon- våren 2024.