Ervervsløyve i kommunen

Tilrettelegging for leigekøyring er kva sentrale styresmakter ser på som kanskje viktigaste botemiddel for å få ned det totale talet på snøskuterløyver. Valle kommune tildelte i siste periode 33 ervervsløyver. Klart flest vart gjevne etter løype 11 og 12, inn mot hytteområde i Everdalen og kring Myklevatn. I desse område er det særleg mange utenbygdsbuande hytteeigarar. Inntrykket er at fleire og fleire kjøper seg eigen snøskuter. Det er likevel viktig at tilbodet på leigekøyring vert oppretthalde, og bidra til at færrast mogeleg har behov for eigen snøskuter. Pris avtalast direkte med den som utfører transporten.

Dei som skal få ervervsløyve må sende skriftleg søknad til kommunen. Dei bør vere fastbuande i Valle kommune, og dei må vere fleksible med omsyn til å kunne ta på seg køyreoppdrag. Søkjarar som har hatt løyve tidlegare, må kunne påvise at dei har hatt ei viss mengde med oppdrag. Planutvalet avgjer kven som får løyve. Ervervsløyve er personleg og kan ikkje nyttast av andre enn søkjar.