Eit knippe av dei som vil ha gamingkafé i soknehuset på Rysstad.
Valle kommune.
Nyleg møttest fem foreldre, minst dobbelt så mange ungdomar frå mellomsteget og ungdomsskulen, ungdomsarbeidar og leiar kultur i Valle kommune for å drøfte ei slik etablering.
– Det var stort engasjement og det kom mange gode innspel til vegen vidare, seier leiar kultur i Valle kommune, Torunn Charlotte Nyberg.
Delvis foreldredrive
Det er meininga at gamingkaféen skal vere delvis driven av foreldra. Kultureininga i kommunen tar seg likevel av oppstarten.
– Me ser for oss at me skal ha eit tilbod i alle fall ein kveld i månaden. Tilbodet skal driftast som eit samarbeid mellom kommunen og foreldre, og rettar seg både mot mellomsteget og ungdomsskulen, seier Nyberg.
Det er kjøpt inn PS-stasjonar. Tanken er å bruke matsalen i soknehuset til ungdomskafé, og møteromet ved sida av til gamingrom.
– Det er ein del praktisk som skal på plass, men me håpar på å starte opp så snart som råd, seier Torunn Charlotte Nyberg.