Gamle Valle sentrum stengt for biltrafikk frå i morgon til sundag
Førstkomande laurdag er det sentrumsfrukost og seinare brusteinsball i Valle sentrum - og heile helga blir gamle Valle sentrum stengt for biltrafikk. Vegen mellom Valle Camp og kommunehuset er open - men både skulevegen inn til sentrum frå sør og likeeins avkøyrsla mellom fontena og Sæbyggjen blir sperra.
Publisert av Ole Birger Lien
Publisert 26.06.2025 10:02
Sist endra 26.06.2025 10:02
Alle vegar inn mot gamle Valle sentrum blir stengt førstkomande helg i samband med sentrumsfrukost og seinare på laurdagskvelden brusteinsball.
Ole Birger Lien
Valle sentrumsforeining har fått løyve av politiet til å halde stengt frå fredag 27. juni klokka 18 til sundag 29. juni klokka 12. Det skal settast opp både skilt og sperringar - opplysningsskilt om stengt veg skal settast opp på Nordibøvegen sør for Valle kyrkje. Fv. 336 blir stengt nord for avkøyringa til Valle Motell med både skilt og betongelement, og Strandbyggevegen blir stengt med kjegler i krysset med Fv. 336.
Bom mellom bygg
Vegen mellom Valle Handel og Frikyrkja blir stengt med kjegler mellom bygningane og dessutan blir det sett ein bom der. Fv. 336 blir stengt ved avkøyringa til sentrum, og det blir sett opp stengt veg-skilt i krysset ved innkøyringa til Valle sentrum. Bussane i sentrum er heller ikkje tilgjengelege der dei plar stå no til helga, men blir flytta til krysset ved fontena, kring 50 meter unna. Det betyr altså at akkurat no til helga blir den gamle delen av Valle sentrum heilt bilfri slik at den tradisjonsrike sentrumsfrukosten, brusteinsballet og all aktiviteten rundt arrangementet kan gå på skinner.