Utan desse og dei andre damene på kjøkkenet hadde det blitt stusseleg i soknehuset. Frå venstre: Jorunn Tveiten, Tone Haugen og Anna Rysstad.
Ole Birger Lien
Leiar pleie- og omsorg, Solveig Kyrvestad, hadde sydd saman eit tettpakka program der det var noko for dei fleste. Alt frå kosthald til høyrsel og teknologiske hjelpemiddel for eldre, flotte innsmett frå Valle kulturskule, suppe og eplekake i salen nede og ikkje minst tid til den gode røa - seniormessa vart ein svært innhaldsrik dag.
Det faglege i fokus
Sjølv om den sosiale biten som del av messa var viktig, var det utan tvil det faglege som var mest i fokus. Aktørar som Valle kommune sjølv, NAV, Setesdal brannvesen IKS, fysiske trenarar, audiograf og mange fleire bidrog til fagleg påfyll. Ikkje minst vart det vist fram ulike teknologiske hjelpemiddel som blir stadig viktigare i pleie- og omsorg - dette er noko me kjem tilbake med meir om med det første.
Kulturskulen sjarmerte alle
Mellom det faglege og suppa tok elevar i Valle kulturskule seg av musikalske smakebitar på alt det dei driv på med. Born og unge i kreativ leik på scena sjarmerte både seniorar og alle andre som var til stades! Heile arrangementet vart leia med fjellstø hand av programleiar Torunn Charlotte Nyberg. Oppsummert må ein bare seie at seniormessa i soknehuset var akkurat den samankomsten både arrangørar og dei som møtte opp hadde håpa på!