Setesdal Spelemannslag, her representert med spreke utøvarar, fekk Valle kommune sin kulturpris 17. mai.
Ole Birger Lien
Setesdal Spelemannslag vart skipa i 1930. I snart 100 år har utøvarar og “støtteapparat” sikra ein kulturarv som er så særprega at han har kome inn i Unesco sine lister over imateriell verdsarv. Så unikt, altså - og eit stykke arbeid det bare er å ta av seg hatten for.
– At me har lokale menneske som kan ta ansvar, forvalte og formidle denne kulturskatten er heilt avgjerande. År etter år – også no i august, skal Setesdal Folkemusikkfestival skipast til. Frå rundt om i heile landet kjem dei hvassaste av spelemenn- og kvinner for å knivast i og rundt soknehuset på Rysstad. Arrangementet er eit vitnemål om standinga folkemusikken har i kommunen vår – også ute – mykje takka vere mangeårig solid innsats frå prisvinnaren. At det neste år blir skipa til Landskappleik på Hovden – i regi av Setesdal Spelemannslag – er prikken over i-en, sa Myrum.
– Kommunen har vore raus
Leiar i spelemannslaget, Astri Rysstad, sa i sin takketale at kommunen har vore raus med Setesdal Spelemannslag over tid.
– Me har dyktige utøvarar og aktive medlemmer, og merker velvilje i heile dalen. Medlemstalet vårt er også aukande, sa ho.
Rysstad minna om at ingen må tru spelemannslaget skal ligge på latsida med Landskappleiken på Hovden i kominga!
Kulturprisutdelinga vart eit flott innslag som del av festprogrammet denne 17. mai. Med dalen og landsdelen bada i sol frå blå himmel fekk både fastbuande og tilreisande, store og små, ein nasjonaldag av dei sjeldne med seg inn mot sommaren!