Valle nominert til Årets kulturkommune av Norsk Kulturforum Agder

Annankvart år kårar Norsk Kulturforum (NOKU) Årets kulturkommune. I år har NOKU Agder nominert Valle kommune til den nasjonale utmerkinga!

Leiar kultur i Valle kommune, Torunn Charlotte Nyberg, gler seg over at Valle kommune er nominert i kåringa til Årets kulturkommune 2025-2026. - Klikk for stort bileteLeiar kultur i Valle kommune, Torunn Charlotte Nyberg, gler seg over at Valle kommune er nominert i kåringa til Årets kulturkommune 2025-2026. Ole Birger Lien

I grunngjevinga for nominasjonen er det lista opp ei heil rekke satsingsområde som ligg til grunn for at Valle kommune no er ein av dei nominerte kommunane for tittelen Årets kulturkommune 2025-2026. I 2019 kom folkemusikk- og dans på Unesco si liste over imateriell kulturarv. Kulturarven har seinare kome inn som fagplan i skulane, og prosjektet Gorrlaus femner også barnehagane.  Valle kommune er dessutan vertskommune for interkommunal Unesco-satsinga i Bykle, Valle og Bygland, som omfattar både Gorrlaus i barnehagar og grunnskular og interkommunal kulturskulelærar i folkemusikk. Folkeakademiet legg kvart år ned ein formidabel innsats for Kulturveka - i fjor vart Folkeakademiet Valle Årets Folkeakademi i Noreg. Også all aktiviteten innan idrett, klatring, motorsport, vintersport og friluftsliv blir peika på, i tillegg til ei rekke faste kulturelle innslag året rundt. Sentrumsfrukosten i Valle, Setesdal folkemusikkfestival, Sauesjåmarknaden og mykje, mykje meir.

Nytt kultursenter

Ikkje minst er det lagt merke til at Valle kommune har nytt kultursenter under byggjing.

– Bare det å bli nominert her er ei ære. Me kjem no i selskap med mange kommunar som legg ned ein betydeleg innsats innan kulturen, og det er moro å sjå at det me gjer i Valle blir lagt merke til, seier leiar kultur Torunn Charlotte Nyberg.

NOKU merkar seg også at samarbeidet innan kultur og det frivillige mellom kommunen og bygdefolket er godt. Valle kommune legg til rette mellom anna med å låne ut lokalar gratis, låge satsar i kulturskulen, honorarfond til folkemusikk, støtte til alt frå Valle Radio til Setesdal Spelemannslag og ikkje minst gratis fritidsbading og sponsa sesongkort i Brokke alpinsenter. Kommunen deler også ut ei rekke stipend og tilskot til ulik kulturell satsing.

Må sende søknad

Alle kommunar som blir nominert må sende inn ein søknad om å bli kåra til Årets Kulturkommune. I juryen sit leiar av kulturkomiteen på Stortinget, Grunde Almeland, KS-leiar Gunn Marit Helgesen og leiar av Norsk Kulturforum, Bård Jacobsen.

– Alle dei nominerte kommunane prioriterer og satsar på kultur, og blir lagt merke til på grunn av viljen til utvikling og aktivitet. Det foregår svært mykje bra på kulturfronten rundt omkring i landet vårt! For oss er det veldig stas å ha hamna i dette fine selskapet, uansett korleis sjølve kåringa går. Alle dei nominerte kommunane er vinnarar, seier Nyberg.