Julie Iversen Solheim er tilsett som ny biblioteksjef i Valle kommune.
Ole Birger Lien
30-åringen er utdanna bibliotekar frå OsloMet, og no altså i full sving i Valle.
– Eg har gleda meg til å kome i gang, og må seie at eg har blitt sers godt motteken her i Valle. Mange har vore innom biblioteket bare for å helse på meg, det har eg sett veldig pris på, seier ho.
Vil utvide biblioteket som møtestad
No i byrjinga blir det nok mest vanleg bibliotekdrift for Julie, men ho har nok av planar.
– Eg vil gjere biblioteket endå meir til ein møtestad. Visst er litteratur og alt det andre ein kan låne viktig, men her i Sæbyggjen ligg alt til rette for at både store og små kan samle seg til ulike aktivitetar. Eg ser for meg alt frå høgtlesing til bokklubbar, og gler meg til å planlegge dette vidare, seier ho.
Trivest alt i bygda
Biblioteksjefen har fått seg bustad på Nomelandssida i Valle, og trivest alt i bygda.
– Så ser eg også fram til å ta naturen her i bruk, for du verda for nokre lier og fjell de har å by på! Så skal eg skunde meg litt sakte, bli endå meir kjent med bygda og bygdefolket, og kome grundig inn i rolla mi her. Eg bare gler meg, for Valle har teke meg godt imot på alle vis, seier Julie Iversen Solheim.
HER er meir informasjon om biblioteket - opningstider, meirope-ordning mm.