Må eg sende inn byggesøknad?

Definisjon

Eit frittliggjande bygg kan vere garasje, carport, bod, dokkehus, lysthus og liknande. Desse bygningane skal ikkje brukast som bustad

Du treng ikkje sende byggesøknad dersom:

• samla bruksareal (BRA) eller bebygd areal (BYA) er under 50 kvadratmeter
• det er over ein meter til nabogrensa
• bygningen blir oppført med tilstrekkeleg avstand frå offentleg regulert veg (kor nær vegen du kan plassere bygningen er avhengig av kva som står i reguleringsplanen)
• maks gesimshøgde er 3,0 meter og maks mønehøgde er 4,0 meter
• bygningen er frittliggjande, på ein etasje og utan kjellar
• du ikkje overskrid kor mykje du har lov til å bygge på eigedomen din (dette finn du i gjeldande plan for eigedomen din)
• bygningen ikkje blir plassert i konflikt med offentlege vatn- og avløpsleidningar
• bygningen ikkje blir oppført meir enn 30 meter frå midtlinja til jernbanelinje

Du må informere kommunen om tiltaket si plassering når det er ferdigstilt, slik at plasseringa kan bli ført inn i kommunen sitt kartgrunnlag.

Melding om bygning eller tilbygg som er unnateken søknadsplikt

Du kan sende byggesøknad på eiga hand dersom

• samla bruksareal (BRA) eller begygd areal (BYA) er under 70 kvadratmeter, og bygningen er maks ein etasje høg (bygningen kan i tillegg ha kjellar)

Søk på eiga hand (lenke til annan artikkel)

Du må sende byggesøknad med hjelp frå fagfolk dersom

• bygningen er over 70 kvadratmeter eller skal bli brukt til å bu i

Definisjon

• påbygg er ein ny bygningsdel som blir plassert på ein eksisterande konstruksjon. Ein ekstra etasje er eit typisk påbygg
• tilbygg er ei utviding av bygningen si grunnflate (fotavtrykk)
• underbygg er ei utviding av bygget nedover, til dømes ein kjellar

Krev ikkje søknad

Dersom tilbygget ikkje har anten bruksareal eller bebygd areal over 15 kvadratmeter, treng du ikkje søke

Viktige føresetnader

• tilbygget må vere understøtta
• tilbygget kan ikkje overstige to etasjar eller plan på det eksisterande byggverket
• tilbygg kan heller ikkje innehalde ei eiga sjølvstendig bueining (leilegheit)
• avstand frå nabogrensa må vere minimum 4 meter
• tiltaket må ikkje kome i strid med plan- og bygningsloven, gjeldande planar eller anna regelverk som til dømes veglova
• dersom du tilhøyrer eit bustadsameige eller eit burettslag, må styret godkjenne det du søker om

Krev søknad

Du kan sende byggesøknad på eiga hand dersom

• det er eit enkelt tilbygg der samla bruksareal (BRA) eller bebygd areal 8BYA) er under 50 kvadratmeter, kan du søke sjølv. Tilbygget kan i tillegg ha kjellar.

Krev søknad sendt inn av fagfolk

Følgjande krev søknad med hjelp av fagfolk

• alle påbygg krev søknad med hjelp av fagfolk
• alle tilbygg der samla bruksareal (BRA) eller bebygd areal (BYA) er over 50 kvadratmeter må du ha hjelp av fagfolk

Definisjonar

• Platting (utegolv) er opparbeida del av uteareal som ligg direkte på bakken eller lågt over terreng. Utegolv kan vere av t.d. stein, tre eller betong.
• Terrasse er planert avsats for uteopphald med direkte tilkomst frå både terreng og huset, ikkje overbygd. Kan vere av ulike materiale. Takterrasse: uteopphaldsareal på eit flatt tak.
• Veranda er eit ytre opphaldsrom innbygd eller som tilbygg i ei bygning med ein eller fleire ytterveggar fjerna, eller erstatta av glassveggar (glassveranda)
• Balkong er opphaldsplass på husfasade, utkraga frå vegg, opphengt eller understøtta, omgitt av rekkverk
• Altan er ein uteplass som er løfta i høgda, vanlegvis over første etasje. Ein altan er understøtta av søyler, garasje, bustadrom eller eit inngangsparti. Altan har ikkje tak.

Krev ikkje søknad

• Platting, terrasse eller utegolv med høgde under 0,5 meter i område med arealføremål byggeområde. Her gjeld ingen avstandsbestemmelsar.
• Terrassar som har ei høgde på inntil 1,0 meter frå eksisterande terreng, er forbunde med ein bygning, og ikkje stikk lenger ut frå bygningen sitt fasadeliv enn 4,0 m. Slike terrassar kan ha eit tilhøyrande rekkverk på inntil 1,2 m, man kan ikkje vere overbygde. Avstanden til nabogrensa skal vere minst 1.0 m.

Hugs at du sjølv har ansvar for å sjekke at det du skal bygge ikkje kjem i strid med plan- og bygningsloven, gjeldande planar eller anna regelverk. Dette kan også påvirke om du må søke eller ikkje.

Krev søknad

Følgjande krev søknad og du kan søke sjølv

• platting, terrasse eller utegolv med høgde over 1,0 meter.
• avstandsreglar gjeld,  tiltaket kan ikkje bli plassert utanfor byggegrense
• tiltaket har samla bruksareal eller bebygd areal på inntil 50 kvadratmeter. Tiltaket må vere i samsvar med plan- og bygningsloven, m.a. ved krav til høgde og avstand til nabogrense
• tiltaket må vere i samsvar med gjeldande plangrunnlag, m.a. bestemmelsar om grad av utnytting, byggegrenser, tillaten størrelse på terrasse og arealføremål
• tiltaket må tilfredsstille krava til estetikk
• tiltaket må bli nabovarsla

Krev søknad sendt inn av fagfolk

Ved platting, terrasse eller utegolv med høgde over 0,5 meter og samla bruksareal (BRA) eller bebygd areal (BYA) over 50 kvadratmeter, må fagfolk søke.

Definisjon

Carport er ein overdekka biloppstillingsplass for høgst to bilar, der minst halvparten av veggflatene manglar og bare to av veggane kan gå til golvet.

Garasje er ein overdekka biloppstillingsplass der det er kledning på 50% eller meir av arealet på dei fire veggflatene.

Må du søke?

Ein garasje eller carport er anten ein frittståande bygning eller eit tilbygg. Om du må søke kommunen om løyve eller om tiltaket er friteke frå søknadsplikt avheng av størrelsen på tiltaket og kva reglar som gjeld for eigedomen din.

• Tilbygg? Meir informasjon  om byggereglane dersom garasje/carport er eit tilbygg (heng saman med bustaden), finn du under punktet påbygg, tilbygg eller underbygg.
• Frittliggande bygg? Meir informasjon om byggereglar dersom garasje/carport er frittliggande (ikkje heng saman med andre bygg på eigedomen) finn du under punktet frittliggande bygg.

Definisjon

Bruksendring er når bruk, føremål eller funksjon blir endra med tanke på den bruken som allereie er tillatt. Ein skal ta omsyn til kva føremål reguleringsplanene stiller opp, og ein skal ta omsyn til omgjevnader, som trafikk, opningstider m.v.

Du treng ikkje sende søknad om bruksendring

Dersom du skal sette inn ein lettvegg. Til dømes lage eit ekstra kontor/hobbyrom/soverom i brukseininga. Det avgjerande for søknadsplikt er kva bruk bygget/lokalet/rommet er godkjent for, og i kva grad ny bruk gir endra føresetnadar. Du kan til dømes sette opp ein lettvegg som deler eit soverom i to utan å søke.

Du kan sende søknad om bruksendring på eiga hand

Dersom du skal ta i bruk bod eller vaskerom og endre til soverom, stoge eller liknande (endre frå tilleggsdel til hoveddel) innanfor eksisterande leilegheit eller branncelle. Dette føreset at du ikkje utfører søknadspliktige tiltak i berande konstruksjonar ved til dømes å senke golv i kjellar.

På Direktoratet for byggkvalitet sine nettsider finn du ein rettleiar for bruksendring

Du må sende søknad om bruksendring med hjelp frå fagfolk

I samband med etablering av leilegheit eller sekundærleilegheit (ny bueining, til dømes til utleige). Du må og søke med ansvarleg føretak ved endring i bruk, til dømes frå kontor til bustad eller frå bustad til forretning.

Det vil vere søknadspliktig med ansvarleg føretak dersom du ønsker å endre ein fritidsbustad (hytte) til bustad (heilårsbustad)

Nyttige nettsider

Kva er i bruksendring

Her får du hjelp til å vurdere om arbeid på ein eksisterande bygning er vedlikehald, vesentleg endring, vesentleg reparasjon eller hovudombygging. Du får også vite om arbeidet krev søknad og om kravena i byggteknisk forskrift (TEK17) gjeld:

https://www.dibk.no/bygge-eller-endre/arbeid-pa-eksisterende-bygg

Fasaden på eit bygg er ytterveggar og tak. Fasadeendringar kan til dømes omfatte:

• bytte av vindauge i yttervegg, tak, loft eller kjellar
• bytte av dører i yttervegg eller kjellar
• etterisolere, rehabilitere, tilbakeføre eller endre fasadekledning
• skifte eller etterisolere tak
• bygge inn balkong med glass, bygge, rive eller utvide balkong
• montering av varmepumpe, markise eller skilt

Mindre fasadeendringar er ofte ikkje søknadspliktige, men dersom endringa bryt/endrar bygget sin karakter og/eller utsjånad, vil det medføre at du må sende inn søknad.

Dersom du skal rive ein garasje, del av huset ditt, eller eit anna tiltak på eigedomen din, gjeld dei samme reglane som ved oppføring av tiltak. Må du søke om å bygge noko, må du også søke om å rive det.

Det vil altså vere søknadspliktig å rive eit tilbygg med stoge eller soverom fordi det også er søknadspliktig å bygge eit tilbygg med stoge eller soverom.

Ved riving av tiltak større enn 100 kvadratmeter bruksareal må det bli utarbeidd ein avfallsplan og miljøsaneringsbeskrivelse. Ved riving/endring av tiltak på denne størrelsen er det krav om at eit ansvarleg foretak søker på vegne av deg.

Om du skal dele opp eller slå saman bustadar, kan du ikkje søke sjølv. Då må du søke med hjelp frå fagfolk (ansvarleg søkjar).

Din rolle i byggesaka er å vere tiltakshavar. Det inneber at du eig tiltaket, men at fagfolk må fylle ut søknaden for deg. Prosjektering og utføring blir og overlatt til fagfolk som du må engasjere og inngå avtalar med. Føretaka må erklære ansvarsrett.

Det kan vere aktuelt å opprette eit sameige eller reseksjonere/slette eit eksisterande sameige.

Dersom du ønskjer å søke om seksjonering/reseksjonering kan du lese meir om det her.

Definisjon

Med bustad reknast her ei sjølvstendig bueining som har alle funksjonar (soverom, stoge, kjøkken og bad) og eigen tilkomst.

Krev søknad

Om du skal bygge ny bustad på eiga tomt, må du få hjelp av fagfolk til å søke om løyve.

Om du skal bygge ei ny leilegheit i huset ditt, må du søke om løyve dersom

• bueininga har alle hovedfunksjonar for bustad, slik som stoge, kjøkken, soveplass, bad og toalett.
• har eiga inngong
• er fysisk atskilt frå øvrige einingar

Din rolle i byggesaka er å vere tiltakshavar. Det inneber at du eig tiltaket, men at fagfolk må fylle ut søknaden for deg. Prosjektering og utføring blir og overlatt til fagfolk som du må engasjere og inngå avtalar med. Føretaka må erklære ansvarsrett.

Om du skal leige ut delar av huset ditt, og det er ei dør mellom den delen av huset du bur i og utleigedelen, treng du ikkje søke

Støttemur

Forstøtingsmurar må ha byggeløyve etter plan- og bygningsloven med mindre den er av ein slik størrelse at den fell inn under tiltak som ikkje krev søknad og løyve.

I saker der du søker om bygging av støttemur mot nabo, kan kommunen kreve nærare opplysningar om materialbruk og estetiske tilhøve. Kommunen kan også kreve at forstøtingsmurar blir utstyrt med rekkverk.

Må du søke?

Du treng ikkje søke om å sette opp ein støttemur dersom den er:

• inntil 1,0 meter i høgde og
• minst 1,0 meter frå nabogrensa

eller

• inntil 1,5 meter i høgde, og
• minst 4,0 meter frå nabogrensa

Krav

• Støttemuren/forstøtingsmuren må ikkje hindre sikt i frisiktsoner mot veg, det vil sei i samband med avkøyrsle frå veg, gardsplass og gang- og sykkelstiar.
• Muren skal heller ikkje vere til skade eller ulempe for naboeigedomane og omgjevnader ved at det til dømes er med å bidra til vannsig, ras eller utgliding.
• I utforminga og plasseringa bør du ta estetiske omsyn slik at muren i tillegg til å vere funksjonell og sikker, også blir ein tiltalande del av eigedomen

Dersom støttemuren ikkje oppfyller ovanfornemnde krav, må du søke kommunen om løyve.

Terrengendringar

Krev søknad

Hovudregelen for terrenginngrep er at dersom inngrepet er vesentleg, må det bli sendt søknad.

Skal du derimot gå i gong med mindre fylling eller planering av terreng, kan denne falle inn under tiltak som ikkje krev søknad og løyve. Kva ein ser på som mindre, vil avhenge av tiltaket sin karakter og innverknad på omgjevnadane.

Krev ikkje søknad

Du treng ikkje søke dersom unntaket gjeld fylling/planering der høgdeforskjellen i høve det opprinnelege ikkje fører til

• meir enn 3 meter avvik i spreiddbygd strøk
• meir enn 1,5 meter avvik i tettbygd strøk
• meir enn 0,5 meter avvik på eigedom for rekke- og kjedehus og liknande i tett busetjing

Her er det viktig å merke seg at avstanden frå fyllingsfoten (altså der inngrepet startar) og til nabogrensa, må vere minst 1,0 meter på eigen grunn, og fyllingstoppane må ikkje vere høgare enn krava som er sette for forstøtingsmurar.

Det er reglar for bruk av skilt og annan "løsfotreklame" i Valle kommune. Ved dei fleste høve er det også søknadspliktig.

Definisjon av skilt:

Fysisk og/eller anna utstyr for å montere, plassere, klebe, projisere eller på annan måte synleggjere ein fast eller utskiftbar bodskap.

Lenke til kommunen sin skiltplan

Krev ikkje søknad å

• sette opp, flytte eller rive ein ikkje-berande vegg innanfor ei og samme branncelle
• skifte ut eller installere nytt utstyr på eksisterande våtrom
• montere ny kjøkkenventilator som ikkje skal bli kobla til ventilasjonsanlegget
• montere ny vask i eksisterande bustad som allereie har sanitæropplegg

Dette gjeld kun for installering, endring og reparasjon av enkle installasjonar. Tiltaket må ikkje røre berande konstruksjonar og ikkje bryte branncellen.

Krev søknad

• dersom du skal gjere andre små endringar innandørs enn nemnd i lista over

Krev søknad med hjelp frå fagfolk

• dersom du skal gjere endringar i berande konstruksjonar og/eller bryte brannceller

Definisjon

Med hybel meiner ein rom i eksisterande bustad som blir brukt til utleige og der ein deler kjøkken, bad og WC anten med andre hyblar eller med primærbustaden. Hybelen er ein del av bustaden og inngår i samme branncelle. Hybelen er ikkje ei sjølvstendig bueining.

Kva tid må du søke om løyve?

Du kan leige ut inntil to hybelrom i ei eksisterande bueining (ein skil ikkje på om bueiningane er godkjende som einebustader, eller to-,tre eller firemannsbustadar) utan å sende inn søknad.

Ved etablering av meir enn to hyblar må du sende inn søknad. Det må altså bli sendt inn ein søknad dersom du leiger ut tre eller fleire rom i ein bustad og ikkje bur i bustaden sjølv. Dersom du leiger ut heile bustaden til ein familie, blir det ikkje krevd søknad.

Krav som må vere oppfylte

Søknad om bruksendring (frå til dømes ein einebustad) til hybelkollektiv/bustad med hyblar, må kome frå eit ansvarleg føretak.

I tillegg til krav om ansvarleg føretak må eigedomen og tiltaket passe inn i omgjevnadane.

Tiltaket må og oppfylle følgjande krav

• Parkeringsbestemmelsane i kommuneplanen sin arealdel er utgangspunktet for utrekning av min-/maksimum tal på biloppstillingsplassar for primærbustaden. I tillegg vil det ved etablering av hyblar utløyse krav om 0,5 biloppstillingsplassar for bil og minst ein sykkeloppstillingsplass per hybel
• Kravet til uteopphaldsareal for primærbustad må løysast i samsvar med bestemmelsar og retningsliner. Vidare er det krav om minst 50 kvadratmeter uteopphaldsareal per hybel.
• Kommunen må vurdere søknaden opp mot andre relevante forhold. Dette er ikkje ei uttømande liste

Definisjon

• Gjerde kan vere plankegjerde, stakittgjerde, flettverksgjerde, smijernsrekkverk eller andre typer rekkverk med ein enkel, open konstruksjon. Open konstruksjon er ein konstruksjon der både gåande og køyrande lett kan sjå gjennom konstruksjonen, uavhengig av synsvinkel.
• Levegg er ein tett skjerm som avgrenser innsyn og støy, og gir ly for vind. Levegg kan vere frittståande eller festa til ei bygning.
• Støyskjerm er ein tett skjerm som avgrensar innsyn og støy og gir ly for vind. Støyskjermen er ofte noko lenger enn ein levegg og har lyddempande materiale.

Du treng ikkje sende byggesøknad dersom

• gjerde er ope og luftig til nabogrensa, og maks 1,5 meter
• levegg som er inntil 1,8 meter høg og inntil 10 meter lang. Den må bli plassert minst 1 meter frå nabogrensa, og må bli plassert med tilstrekkeleg avstand frå offentleg regulert veg
• levegg som er inntil 1,8 meter høg og inntil 5 meter lang. Den kan bli plassert inntil eigedomsgrensa, og må bli plassert med tilstrekkeleg avstand frå offentleg regulert veg

Dersom du skal sette opp eller rive ein støyskjerm, må du ha hjelp av fagfolk (ansvarleg føretak)

Dersom du skal endre eller opprette ei ny avkøyrsle utan ei tilhøyrande byggesak, må du søke om løyve i ein eigen søknad som du sender til kommunen. Dersom du ønskjer endra avkøyrsel frå riks- eller fylkesveg må du ha avkøyringsløyve frå Statens vegvesen.

Dette løyvet må du legge ved søknaden du sender inn til kommunen.

Om du skal bygge eller rive bustad, kan du ikkje sende byggesøknad sjølv. Søknaden må bli utarbeidd av fagfolk (ansvarleg søkjar).

Din rolle i byggesaka er å vere tiltakshavar. Det inneber at du eig tiltaket, men at fagfolk må fylle ut søknaden for deg. Prosjektering og utføring må og bli overlatt til fagfolk som du må engasjere og inngå avtalar med. Føretaka må erklære ansvarsrett.

Du må alltid melde frå

Uavhengig av om du må sende byggesøknad eller ikkje, må du alltid sende melding til Setesdal brannvesen IKS når du installerer eller fjerner ein eldstad. Dette gjer du for at Setesdal brannvesen IKS skal få operert raskare og tryggare dersom det oppstår ein brann.

Du kan melde frå her